၂၀၁၂ လယ်ယာမြေ ဥပဒေ၊ ၂၀၁၂ မြေလွတ်မြေလပ်နှင့် မြေရိုင်းများ စီမံခန့်ခွဲရေး ဥပဒေတို့ ပေါ်ထွက်လာပြီးနောက် မြေယာပြဿနာများ ပိုမိုရှုတ်ထွေးလာသည်ကို တွေ့ရသည်။ လယ်ယာမြေ ဥပဒေ၏ မပြည့်စုံမှု၊ ပြဋ္ဌာန်းချက်အချို့သည် တောင်သူတို့၏ သဘော သဘာဝနှင့် လိုက်လျောညီထွေ မဖြစ်မှု၊ ဗဟိုအဆင့်မှ လိုအပ်သော ညွှန်ကြားချက်များ ထုတ်ပြန်ရှင်းလင်း မပေးနိုင်မှု၊ လယ်/စီအဖွဲ့အဆင့်ဆင့်၏ အားနည်းမှု စသည်တို့ကြောင့် လယ်ယာမြေ ဥပဒေကို ကိုင်တွယ်ကျင့်သုံးရာတွင်လည်းကောင်း၊ လယ်ယာမြေ ပြဿနာများ ဖြေရှင်းရာတွင်လည်းကောင်း အခက်အခဲများ ရှိနေသည်ကို မြင်တွေ့နေရပါသည်။ ယခုစာအုပ်တွင် ပါဝင်သော ဆောင်းပါး အများစုသည် လယ်ယာမြေ ဥပဒေ၏ အားနည်းချို့ယွင်းမှုများ၊ ယင်းကြောင့် ဖြစ်ပေါ်နေသော ပြဿနာများကို ဦးတည်ဆွေးနွေး တင်ပြထားပါသည်။
တောင်သူလယ်သမားများအတွက် အထောက်အကူပြုနိုင်စွမ်း နည်းပါးနေသည့်အပြင် ဝန်ထုပ်ဝန်ပိုးများ ပါဝင်နေသော၊ မြေယာစီမံခန့်ခွဲနိုင်ရေးအတွက် အားနည်းချက်များ ပါရှိနေသော ၂၀၁၂ လယ်ယာမြေ ဥပဒေကို ခေတ်စနစ်နှင့် လိုက်လျောညီထွေရှိပြီး တစ်နိုင်ငံလုံးရှိ တောင်သူလယ်သမားများ၏ လယ်ယာမြေလုပ်ခွင့် အခွင့်အရေးများအတွက် အပြည့်အဝ အာမခံပေးနိုင်သည့် ဥပဒေအဖြစ် ပြင်ဆင်နိုင်ရေး ထည့်သွင်း စဉ်းစားသင့်သည့် အချက်များကို စာရေးသူ ရှုမြင်သည့် ရှု့ထောင့်မှ မီးမောင်းထိုး တင်ပြထားခြင်း ဖြစ်ပါသည်။